पोखरा २ पुस ।पोखरामा संचालन हुने दुई ठुला फुटबल प्रतियोगिताको मिति जुधेपछि उत्पन्न विवाद समाधान भएको छ । एन्फा कास्कीले प्रतियोगिता पुस २२ देखि माघ ३ गतेसम्म संचालन गर्ने र सहाराले माघ २० वा २७ गतेको मिति माग गरेपछि विवाद समाधान भएको हो ।अखिल नेपाल फुटबल संघ एन्फाले केन्द्रीय उपमहासचिव गणेश भटराईलाई विवाद समाधानको जिम्मेवारी दिएको थियो । भट्टराईको पहलमा एन्फा कास्की र सहारा क्लबका पदाधिकारीको वार्तापछि एन्फाले एक साता अगाडि सार्ने र सहाराले माघ तेस्रो साता पछिको मिति माग गरेपछि पोखरामा संचालन हुने दुई ठूला फुटबल प्रतियोगिताको विवाद अन्त्य भएको हो ।
यसअघि एन्फा कास्कीले पुस २८ देखि मनकामना पोखरा दर्शन कप र सहारा क्लबले तेहौ संस्करणको आहा रारा गोल्ड कप माघ ६ गतेबाट गर्ने तयारी गरेका थिए । एक साताको फरक मै प्रतियोगिता संचालन गर्ने दुई संस्थाको विवादले अन्यौलता छाएको थियो । ‘एन्फा र सहाराका पदाधिकारी सहित भएको छलफलबाट विवाद मिल्यो,’ एन्फा कास्कीका अध्यक्ष धर्मसिंह लामिछानेले भने । ‘एन्फा उपमहासचिव गणेश भट्टराईको सहभागीतामा एन्फा र सहाराका पदाधिकारीसहित भएको छलफलले समस्याको समाधान निकालेको हो’, एन्फा अध्यक्ष लामिछानेले भन,े ‘अव खेल खेलाउने विषयमा विवाद छैन् ।’
यता सहारा क्लबका अध्यक्ष वीरभद्र आचार्यले पनि एन्फा अगाडि सर्ने र आफुहरु पछाडि जाने सहमति भएको बताए । ‘सौहादपूर्ण वातावरणमा बसियो । सधै विवाद नहोस् भन्ने हिसाबले मिल्यो,’ अध्यक्ष आचार्यले भने, ‘एन्फा कास्कीको प्रतियोगिता पछाडि सरेकाले यस वर्ष मिलाएर गर्ने र आगामी वर्षदेखि एन्फाले मंसिर पहिलो हप्ताभित्रै र सहाराले माघमै गर्ने सहमति भयो ।’‘हामी मिति सार्नेमा सहमत भएको हौ, तर, एन्फा केन्द्रले लिखित रुपमा मिति तोकेर दिएको छैन्, त्यसले गर्दा अन्यौलमा छौ,’ अध्यक्ष आर्चायले भने । आफुहरुले विवाद मिलाउने जिम्मेवारी पाएका उपमहासचिव भट्टराईसंग माघ २० गतेको मिति माग गरेको उनले बताए । ‘पहिला हामीले २० वा २७ गते मध्य एक जुन भएपनि हुन्छ भनेका थियांै तर अहिले माघ २० गतेको मिति उपयुक्त हुने भएकाले, त्यही मिति मिलाईदिन आग्रह गरेका छौ’ उनले भने ।
विवाद समाधानको जिम्मेवारी पाएका गणेश भट्टराईलाई यस विषयमा जिज्ञासा राख्दा विवाद समाधान भएको बताउँदै एन्फाका सिइओ देश बाहिर भएका कारण मिति तोक्न समस्या भएको र बुधबार टुङ्गो लाग्ने बताए । ‘केन्द्रीय अध्यक्ष नभएको र कार्यवाहक अध्यक्ष र सिइयो पनि बाहिर भएका कारण बैठक बस्न नपाएको र उहाँहरु आज (मंगलबार) नेपाल आएकाले बुधबार मिति टुङगो लाग्ने छ ।’ माग गरे अनुसार नै निर्णय गर्न आफुले आग्रह गरेको बताए । ‘उहाँहरुले मागे अनुसार नै बुधबारको बैठकले निर्णय गर्ने छ,’उपमहासचिव भटराईले भने ।
Comments are closed.