काठमाडौंबैशाख ६, २०७८
प्रधानमन्त्री केपी शर्मा ओलीले मुलुक कुनैपनि बेला निर्वाचनमा जानसक्ने भएकाले त्यसका लागि तम्तयार रहन पार्टी पंक्तिलाई आग्रह गरेका छन् ।
प्रतिनिधि सभा पुनःस्थापना भएपनि यसले राजनीतिक स्थायित्व प्राप्त गर्ने सम्भावना कमजोर रहेको ओलीको निष्कर्ष छ ।
सोमवार बसेको एमाले दशौं राष्ट्रिय महाधिवेशन आयोजक कमिटीको बैठकमा राजनीतिक प्रतिवेदन पेश गर्दै ओलीले देश कुनै पनि बेला निर्वाचनमा जानुपर्ने भएकोले तम्तयार अवस्थामा रहन पार्टी पंक्तिलाई आह्वान गरेका हुन् ।
‘कुनैपनि बेला निर्वाचनमा जानुपर्ने भएकाले त्यसका लागि तम्तयार हुन पार्टी पंक्तिलाई आह्वान गरिएको छ,’ राजनीतिक प्रतिवेदनबारे एमाले प्रवक्ता प्रदीप ज्ञवालीले भने ।
प्रतिवेदनमा अहिलेको राजनीतिक परिस्थितिको समीक्षा र निष्कर्षको रूपमा अहिलेको संसद्ले निकास नदिने उल्लेख गरिएको छ ।
‘प्रतिनिधि सभा पुनःस्थापना भएपनि मुलुकले राजनीति स्थायित्व प्राप्त गर्ने र वर्तमान समस्या समाधान गर्ने सम्भावना कम हुने कुरामा विशेष जोड दिइएको छ,’ ज्ञवालीले भने ।
ओलीले नेकपाको तीन वर्षको एकीकरणको समीक्षा गर्दै आफूहरूको प्रयास सही भएपनि केही गलत पात्र र प्रवृत्तिका कारण असफल भएको निष्कर्ष निकालिएको छ ।
‘सरकारका तीन वर्षे कामको समीक्षा गर्दै धेरै प्रतिकूलतामा पनि महत्त्वपूर्ण उपलब्धि हासिल भएको राजनीतिक प्रतिवेदनमा उल्लेख छ,’ ज्ञवालीले भने ।
बैठकले पार्टी निर्माण र वैचारिक संगठनात्मक काम, जनआधार निर्माणको कामलाई तीव्र बनाउने निर्णय गरेको छ ।
बैठकले विभाजनकारी गतिविधिमा लागेका नेतालाई फर्किन आग्रह गरेको र नफर्के कारवाही गर्ने निर्णय गरेको ज्ञवालीले बताए । लोकान्तर बाट साभार
Comments are closed.