ऋषिकान्त पौडेल
पोखरा ९, बैशाख
सात तालको वाटिका शहरका रुपमा परिचय बोकेको लेखनाथको पचभैयाको पर्यटकीय सम्भावनाबारे विदेशी दातृ निकायको समेत चासो बढ्न थालेको छ । पछिल्लो समय चिडियाखाना निर्माणको पहल सुरु भईरहेका बेला नेपालको प्रमुख दातृ निकाय विश्व बैङ्क समूहको सदस्यका रुपमा रहेको ईण्टरनेशनल फाइनान्स कर्पोरेशनले पर्यटन सम्भाव्यता र आवश्यक पूर्वाधार विकासमा अध्ययन गर्ने भएको हो । केही समयभित्रै पचभैयाको पर्यटन सम्भाव्यता, आवश्यक परीयोजना र पूर्वाधारका बारेमा गुरुयोजनाको तयारीमा रहेको कर्पोरेशनले बुधवार स्थानीयस्तरमा अन्तरक्रियासमेत गरेको छ । आईएफसीले दुई महिनाअघि मात्रै पर्यटन मन्त्रालयसँग देशका ६ ओटा क्षेत्रको पर्यटन विकासका लागि परियोजना तयार पार्ने विषयमा हस्ताक्षर गरेको थियो । सोही अनुरुप अध्ययन गर्ने क्रममा आईएफसीको तीन सदस्यीय टोलीले पचभैया क्षेत्रको विकासका लागि पहिलो चरणको छलफल र भेटघाट अघि बढाएको हो । आगामी हप्तासमेत स्थानीयवासीसँग छलफल गर्ने तयारीमा जुटेको टोलीले स्थानीयस्तरमा बनाईएको पर्यटन सम्भावनाको प्राविधिक गुरुयोजनाबारे पनि अध्ययन गर्नेछ ।
“हामी सिधै आर्थिक सहयोग गर्ने निकाय त होईनौं तर सम्भाव्यताबारे अध्ययन गरेपश्चात लगानीकर्ता र अन्य सहयोगी संस्थाको ध्यान यस क्षेत्रमा खिच्न मद्दत गर्नेछौ जुन पचभैयाको विकासमा कोसेढुङ्गा सावित हुनेछ” टोलीका एक सदस्यले पोखरा हटलाइनसँग कुरा गर्दै भने । पोखराबाट नजिकै भएर पनि आवश्यक प्रचारप्रसारको अभावमा पछि परेको महशुस आफुले पनि गरेको भन्दै राष्ट्रिय र अन्र्तराष्ट्रियस्तरमा चिनाउन सबैले सक्दो मद्दत गर्न पनि उनले आग्रह गरे । छलफल कार्यक्रममा उनले हतारमा कुनै परियोजना सुरु गरीहाल्नुभन्दा बढी भन्दा बढी अध्ययन गरेर अघि बढे पचभैया पर्यटनको क्षेत्रमा नमूना बन्न सक्ने विश्वस उनको थियो ।
कार्यक्रममा बोल्दै लेखनाथ उद्योग वाणिज्य संघका अध्यक्ष बाबुराम गिरीले पर्यटनको दिर्घकालिन विकासका लागि पचभैयामा रहेका प्राकृतिक सुन्दरताको संरक्षण नै मुल दायित्व रहेको बताए । पोखरामा अन्र्तराष्ट्रिय विमानस्थल निर्माणको काम थालनी भएपश्चात नजिकै रहेको पचभैया क्षेत्रको पर्यटन विकासले समग्र पश्चिमाञ्चल क्षेत्रलाई माथि उकास्ने धारणा गिरीको थियो ।
स्थानीय बेगनास रुपा संरक्षण तथा प्रर्वद्धन समितिका अध्यक्ष दिनानाथ ढकालले विभिन्न कारणबाट लोप हुने खतरामा रहेको रुपातालको संरक्षणका लागि चेकड्यामको आवश्यकता महत्वपूर्ण रहेको भन्दै सोका लागि सरकार र अन्य सहयोगी निकायको ध्यानाकर्षण गराएका थिए । लेखनाथ नगरपालिकाका कानुनी सल्लाहकार राममणी अधिकारीले पचभैयाको समग्र विकासका लागि कुनै पनि दातृ निकाय तत्पर रहे नगरपालिका सहकार्य गर्न ईच्छुक भएको बताए । छलफल कार्यक्रममा आईएफसीको टोलीका सदस्यहरुलाई स्थानीय विष्णुदत्त घिमिरे, बेगनास लेक रिसोर्टका व्यवस्थापक अर्जुन पराजुली, ईन्जिनियर बसन्तमोहन भट्टराई, स्थानीय समाजसेवी दामोदरभक्त थापा लगायतले पचभैयामा पर्यटन विकासको सम्भावना र यस क्षेत्रको महत्ववारे जानकारी गराएका थिए ।
Comments are closed.