पाेखरामा बिहीबार भिषण बर्षा, १ घण्टामै ७१.७ मिलिमिटर (हेर्नुहाेस फाेटाे फिचर )

पोखरा–
पोखरामा विहीबार दिउँसो भिषण वर्षा भएको छ । तीन दिनदेखि दिनहुँजसो दिउँसो पानी पर्ने गरेको भए पनि विहीबार दिउँसो बजार नै अस्तव्यस्त हुने गरी वर्षा भयो । पोखरा विमानस्थलको हावापानी शाखाका अनुसार एक घण्टाको अवधिमा पोखरामा ७१.७ मिलिमिटर वर्षा भएको छ ।
विमानस्थल शाखाका रामचन्द्र सापकोटाले एक घण्टामा अत्यधिक वर्षा भएको बताए । ‘एकघण्टामा यतिधेरै पानी पर्नुलाई धेरै मान्नुपर्छ,’ उनले भने । सापकोटाका अनुसार पोखरामा मंगलबार ४२।५ र बुधबार २९.२ मिलिमिटर वर्षा भएको थियो ।
क्षेत्रीय हावापानी कार्यालय पोखराका प्रमुख राजाराम ढकालले अहिलेको वर्षा मनसुन नभई स्थानीय प्रभावले भएको बताए । यतिबेला मनसुन भित्रिने बेला भएपनि पूर्वबाट प्रवेश गरी नसकेको उनले बताए ।
मनसुनी वर्षा पूर्वबाट सुरु भएर पश्चिमसम्म वर्षा गराउँदै अघि बढ्छ । तर यतिबेला पोखरा आसपासमा मात्र पानी परेकोले यो स्थानीय प्रभाव रहेको उनले बताए । ‘पोखरा यसैमा पनि धेरै पानी पर्ने ठाउँ हो । त्यहि भएर यहाँ परेको हो’ ढकालले भने ।
वर्षाले पोखरा बजार दिउँसो साढे ३ बजेदेखि एकघण्टासम्म अस्तव्यस्त बनेको थियो । वर्षाको भेलले गुडेका सवारीलाई समेत बाधा परेको थियो । विद्यालयबाट बस चढेर घर फर्केका विद्यार्थीलाई ओर्लेर घरसम्म पुग्नसमेत मुस्किल परेको थियो । भेल एकै ठाउँबाट सोहोरिएर बग्दा भित्री गल्ली पुरै जलमग्न भएका थिए । बजारका मुख्य चोक अस्तव्यस्त बनेका थिए ।
चिप्लेढुंगा, सिद्धार्थचोकबाट सोहोरिएर गएको भेलले ड्यामसाइडका घरसमेत डुबानमा पारेको स्थानीयले बताएका छन्। ड्यामसाइडका स्थानीय जीवन भट्टराइले ढलको क्षमता कम भएपछि पानी घरघरमा छिरेको बताए। ‘सबैतिरको पानी एकैठाउँ सोहोरिएर बग्दा ढलले थेग्न सकेन । त्यसको असरले भेल घरभित्र पसेको हो’ उनले भने, ‘नगरपालिकाले ढल व्यवस्थित नगर्दा तल्लो भेगका बासिन्दा सँधै मारमा पर्छन्’ ड्यामसाइडका आधा दर्जन घरभित्र पानी पसेको उनले बताए ।