घाईते पत्रकारलाई क्षतिपूर्ति दिन गरिएको ढिलाईप्रति विरोध

पोखरा, १३ पुस
नेपाल पत्रकार महासंघको केन्द्रीय महाधिवेसनमा सहभागी हुन जाने क्रममा बस दुर्घटनामा परी घाईते भएका पत्रकार बसन्तराज अधिकारीको उपचार खर्च ब्यहोर्न सगुन यातायातले गरेको ढिलासुस्तीको पत्रकारहरुले विरोध गरेका छन् ।
आइतबार पोखरामा आयोजित कार्यक्रममा उपस्थित अधिकांश पत्रकारले पूर्व सहमतिअनुसार सगुन यातायातले उपचार खर्च व्यहोर्नुपर्नेमा अनेक बहानामा ढिलाई गर्न खाजेको भन्दै आक्रोश व्यक्त गरेका हुन् । तत्काल उपचारमा लागेको खर्च उपलब्ध गराउनुपर्नेमा जोड दिदै उनीहरुले अब पनि आलटाल गरे सगुन यातायातका विरुद्ध आन्दोलन गर्न पनि पछि नपर्ने चेतावनी दिएका थिए ।
नेपाल पत्रकार महासंघ कास्कीका अध्यक्ष ज्ञवालीले क्षतिपूर्तिस्वरुप पाउनुपर्ने उपचार खर्चका लागि सरोकारवालाहरुसँग छलफल भईरहेको र कानुनी प्रक्रियामा जानुपरेपनि महासंघ तयार रहेको जानकारी गराएका थिए ।
यसैबीच, जापान भ्रमणमा जान लागेका नेपाल प्रेस युनियनका पुर्व केन्द्रीय उपाध्यक्ष गङ्गाधर पराजुलीलाई पोखराबाट आइतबार बिदाई गरिएको छ ।
नेपाल प्रेस युनियन कास्कीले कार्यक्रम गरी उनलाई बिदाई गरेको हो । कार्यक्रममा पोखराका अग्रज र युवा पत्रकारहरुले उनलाई खादा र माला लगाइदिएर बिदाई गरेका थिए ।
उनी आइतबार राजधानी प्रस्थान गरेका छन् भने मङ्गलबार जापानका लागि प्रस्थान गर्ने छन्। उनी जनवरी १२ सम्म जापानमा रहने छन् । जापानस्थित हेप्पी साइन्स नामक संस्थाका सदस्य आचुसी सिवाताको निमन्त्रणामा उनी जापान जान लागेका हुन् । भ्रमणका क्रममा उनले हेप्पी साइन्स संस्थाको निको नासुसोझा, हामानाको, नागोया शाखा सहित नागोया, टोकियो, उत्सोनोमिया लगायतका स्थानहरुको भ्रमण गर्नेछन् ।